منتدى اللحالي

منتدى اللحالي (http://allahale.net/vb/index.php)
-   قـصـة وأبـيـات (http://allahale.net/vb/forumdisplay.php?f=29)
-   -   سالفه وقصايد (http://allahale.net/vb/showthread.php?t=1868)

اللحالي 03-12-2016 03:22 AM

سالفه وقصايد
 
حبايبي الجميع ؛؛ السلام عليكم ورحمة الله وبركاته

أمّا بعد ؛؛ إليكم الاتي

السالفه وما فيها إن أخوي مزعم بن وهق بن جازي آلكمي

سبق وأن صار بيننا معرفة وتبادل آراء في منتدى مجالس حرب
وحصل على المجالس انقطاع قبل أن تعود مجدّداً

وانتقلت ؛ أنا لمجالس المواعزه وحصل لنا لقاء هناك وبعد مدّه

وكلّ ذلك عن طريق:: النّت:: لم أشاهد أبو وهق شخصيّاً

وفتحت الموقع هنا اللي هو منتدى اللحالي بعد أن كان مدوّنه

وطالت المدّه لم أعرف عن أخي شيء واشتقت لهواشي وياه

وجاءت لي فرصه لمعرفة رقم جواله من أخ عزيز عن طريق شخص آخر

وحبيت أتأكد بدون احراج وأرسلت رساله بها بعض الميانه

مبيناً فيها من أنا وهل أنت ما أقصده أكيد ولم يأتي ردّ سريع وبينما أفكّر

ابعث له أبيات بصفته شاعر ؛ وإذا بصديق يرسل لي قصيده لا أعلم هل هي له
أم لغيره ولكونها تحتوي على مواضيع مقاربه بعض الشّي من ما أريده ؛؛ ارسلتها له

وهذا خطأ منّي ولا شك؛؛؛ ولكن قلت إن ما في الأبيات سيجبره

على النّطق وهذا ما حصل بالفعل وإليكم الأبيات المجهوله




لا بغيت تجس نبض الصداقه مع صديق=جرّبه في الطرقه اللي بعيدن حدّها
الرّوابع وافيه في نبأ الوجه الطليق=والنّفوس الرّاهيه ما تبيّح سدّها
الكفو من طيب راسه تفج به الطّريق=فزعته في الضّيق لابدّها لابدّها
والرّدي لامن نصيته مثل لمعة بريق=نعنبو خوّة جنابه على ابوجدّها
اكسب النّاله وشرّف على قمّة طويق=ومدّ كف الجود لأهل المراجل مدّها
يا رفيقي والله إني معك دايم رفيق=لابلتك ظروف بقعا وبيّن شدّها
أحتمي وأغير وأغوص فالبحر العميق=وانثني دون الصعيبات وآطى خدّها
لاني مقصّر بحقّك لو إن حالي عويق=ولا تقصّر في حقوقي وبعرف ردّها
إن بدالك موجبه فابشر بفعل يليق=وإن بدالي موجبه يا رفيقي بدّها
الليالي دروس وتخلي النايم يفيق=لين يعرف فالزمن جزرها من مدّها


وما إن وصلت للشاعر مزعم الكمي ردّ بالأتي





ياللحالي ما نظمنا على السلك الدّقيق=العلوم الطّيبه تعرف إنّي قدّها
الوفاء من طبعنا والرّدى يلقى عشيق=استمع ردّ المعاني وخذ من جدّها
الرّدي جعله بطقّاق في وادي سحيق=لو بغى يبني علوم الرّجال يهدّها
لو تشوفه حي يأخذ زفير مع الشهيق=كل خطواته تعوّد لنفسه ضدّها
واللحالي حاسبينه ولد عمٍ شقيق=دوك يا رقم اللحالي علومي ودّها
كل ما مرّيت إشاره وأنا مع هالطّريق=قلت هذي عدها ثم هذي عدّها
والعزايم والصّمايل ليا شبّة حريق=كم غزاةٍ ياللحالي قدرنا نصدّها
بيتنا الحاضر على ساس مبنانا العتيق=السّلوم نعزها ما دفنّا عدّها
من نصانا ينفرج عنه بإذن الله ضيق=وقفةٍ بالمال وإلاّ السيوف وحدّها
واسلم وسلّم على كلّ حربي بالفريق=والعلوم اللي تمثلني أرفع يدّها

الشاعر مزعم الكمي



وردّيت بالآتي والعذر من أخوي مزعم والأخوان هنا والخوات والزّوّار عموم




النّظر لا صار له خطفةٍ من رميق=يغنم الفرصه ويسبق بوقته لدّها
لو تعذّر زمانه واستشاط الحميق=دام هو فالبسيطه ويضحك خدّها
بلقت العين في ما يهتويه البليق=في سنوع النّظاير ينخلف كدّها
وأدري إنّك زعيم وفي رجا الله وفيق=يا معشّي هل الطّولات بكره غدّها
وأدري إنّك على فعل الجزايل سبيق=مير قلت أعرف بجزر البحور ومدّها
يا مبهّر دلالك و يا محلّي البريق=هدّ شقر الصقور مع الفضاء هدّها
أنت من لابةٍ يشهد لها المنجليق=مثل قول الشّوام اعلوم ما بدّها
يوم جدوى الجبان مشاهمه والنّشيق=وقشعةٍ اوحصاةٍ يلوذ بسدّها
ما هو اليوم يوم الوقت فينا رويق=لو تحدود حدايدنا نقوم نحدّها
وافترقنا لمدّه قلت ملزوم أويق=النفوس العزيزه وش سبب صدّها
خابرن عايم الغبّه ويمكن غريق=كان ما زادت أمواله وبحل بعدّها

وأرجو العذر من الشاعر مزعم والجميع



دحمان-الحاج 03-12-2016 06:07 AM

صح لسانك ياللحالي يا شاعرنا الغالي
وصح لسان الشاعر مزعم الكمي

اصايل 03-12-2016 07:14 AM


صح لسانك ولسان الشاعر مزعم

وبيض الله وجيهكم
أحترامي وتقديري


فارس الامواج 03-12-2016 08:17 AM

صح لسانك ياشاعرنا / يابوسلطان

وصح لسان ابن العم الشاعر / مزعم الكمي


الساعة الآن 01:09 PM

Powered by vBulletin™ Version 3.8.7
Copyright © 2024 vBulletin Solutions, Inc. All rights reserved. منتديات