منتدى اللحالي - يأهل الدردشه

بالله يأهل الدردشه والمراسيل
رسايل الوتساب وش تاليتها

ألنا سنه مابين رابط وتـحميل
أليا مـتى و عـيوننا فـأجهزتها

يامن يبشرني متى يطلع سهيل
و نحدد الرّحله و نعـرف جـهـتها

حـنا طراقي فالحـياه ورحاحـيـل
نمسي على البيدا ونصبح تحتها

ان مـاحـصل سجّه وخوة رياجيل
وشـهي حـياة الادمي وثمـرتها

لكنّ يالله ترحم الارض بالسيل
عـقـب جفاف جبالها واوديتهـا

بالرايحات اللي بخيرك محاميل
اللي لامـرّت ديـرتن سـيلـتها

دهمٍ ليا قامت تصب الهماليل
اضفت على كل الديار ابركتها

من غيبة الصفره ليا تالي الليل
ماجـهّـت ولاوقـفـت ونـدقـتها

مخايلن مـاهي بمثل المخاييل
يبى يهرجون العرب عن سنتها

تحي العروق اليابساتٍ المذابيل
عقب الدّبا اللي دابين فشجرتها

صح لسان شاعرها
م/ن