الـبـارحـه عـيــن عـيـونــي يـنـامــن=واليوم من بعد السهر وضعهن سي
مــن كـثـر مـا هـن للصـبـاح يتـحـرن=نجضة قلوب امواقهـن والحـدق نـي
إن ادلهم الليل رسل العناء جن=واقضـيـت ليـلـي بـيـن أمــر ونـاهـي
مرسال ينهانـي عـن الشـك والظـن=ومرسـال يأمرنـي بفتنـت هـل الـغـي
مدري أطاوع من وأعصى على من=أصبـحـت مـا أخـذت الـقـرار النهـائـي
متـحـيـرٍ مـا بـيـن مـا أبــدي ومــا أكــن=كـنـي مـصـدق شــي ومـكـذبٍ شـــي
واللـي نبـي ما هـو علـى ما يبـن هـن=وأقــول مـا هــي هـــي لـو إنـهـا هـــي
مـا غـيـر أعــيــد الــذاكــره وأتـفـطــن=فـي حاضـري واللـي فعلتـه بماضـي
لـيـا عـاد مـا بــي ما يـقـولـن الألـســن=مدري مثورات الفتن وش تبـي فـي
كـلامـهـم خـلــى ضـلـوعــي يـلـجــن=لجـة مخالـيـلٍ لـواهـا العـطـش لــي
ورداً علـى عدٍّ بـه العـام شـربـن=وجفـت رواتـه ما بـهـا ريـحـة الـمـي
ما غيـر هـو مــن الـمــوارد يـخـبـرن=وتحارجـن فوقـه علـى حاجـر الطـي
ومن غربت الحاصل عضامـي تثنـن=عجـزٍ يشدنـي عــن الأرض رجـلـي
واللـي ذهـل عقلـي وخـلانـي انـجـن=خـطـيـة الـمـيـت يـعــذب بـهــا حـــي
الميـت اللـي مـات مبطـي ولا دفــن=جنـازتـه بـلـوى ومــن ناشـهـا بـلـي
وإن قلـت هـذا كـيـف كــان وتـكـون=سجل علي أكثر من اللي غـدى لـي
ما لي سوى صبرٍ علـى سالفـتهـن=لـو إنـهـا تــجــرح وتــذبــح وتــكــوي

الله مـن هــم لحـالـي يلـوفـي=همن يسـم الحـال ويلوفهـا لـوف
لـوف الهبـوب لدانيـات القطوفـي=غصنه ليان ويصفقه كـل عاصـوف
وأسباب مابي علتـن وسـط جوفـي=وعزي لمثلي علتـه داخـل الجـوف
دنيـاي عجفـا والنصيـب معجوفـي=يصفق بجنحان بلى ريـش مصفـوف
مغيـر أهديهـا عسـاهـا تطـوفـي=أزمه تمـر الادمـي عـام وتطـوف
لاكنهـا طالـت وكثـره صـدوفـي=واشتلت حملن فيـه مغـرم ومكلـوف
حملـن ثقيـل وما تشيلـه اكتـوفـي=أثقل علي من رواسـي جبـل عـوف
شلتـه لحالـي والقريـب يشـوفـي=وأزرى يساعدني على الحمل ويـروف
وقتي يصارعنـي بحـدب السيوفـي=وأصارعه لو ما معي خيـل وسيـوف
يا كثـر هقواتـي ويا كـثـر خـوفـي=تدفعنـي الهقـوه ويمنعنـي الخـوف
واللي حداني عـن هـواي ظروفـي=خلتني أرجع عن مرادي وأنا اشـوف
وقفت ليـن إنـي عزفـت الوقوفـي=واليـوم ما بيـدي مقعـد ولا وقـوف
علـى زمـانٍ فاتـنـي واحسـوفـي=اللي وقفـت بماقفـن فيـه حرفـوف
أحسب عميلي صادقـن بـي ويوفـي=لكن عميلي منهجـه غيـر معـروف
إن جيت يبسط لـي جميـع الكفوفـي=وإن رحت عن درب السنع جاه صادوف
يمـدنـي برقيـقـات الـحـروفـي=اثري حروف الشيخ تتلى لها حـروف
اعمل واحسب اللي عملـت مخلوفـي=في واحدن فيه العمل غيـر مخلـوف
في جاحد المعروف ضـاع معروفـي=مير العوض في خالق الروح والشوف

حي الجواب اللي لفاني مســجل=سجلت في صفحة حياتي سجله
رسالة منها ضميري تزلزل=والقلب هاج وكل همٍ دخــله
ورحبت بالمكتوب من حيث ما حـل=ترحيبةٍ تشفي الكبود الـــمقله
حزة وصلني صار قلبي له مــحل =لحيث إن هذا منتهاه ومــحله
ظليت خمس شهور فيها أتــامل =حتى عرفت اللغز واخترت حــله
واللي محيرني وخلاني ابـــحل=ازريت لاعرف صاحبي ويش ذله
وأخرت بالمردود من خوف لا عجل=والمعتجل ما تنقضي حاجةٍ له
والمشكله فيها اكثر الناس تجــهل=والفرق واضح بين عله... وعله
ثلاث ما ينلام فيهن الــــيا ذل=لو ذلله منهن شفاء راس ظـله
الاوله سطوة يمينه اذا اغــــتل=في ساعةٍ فيها يعديه غـــله
الثانيه زلت لسانه الـــــيا زل=يفرح بها اللي بالخطا يسـتزله
والثالثه درب العوج مايــتـعدل=اللي يوديه الدروب المــخله
يوم اتضح ليه مراده هوى خــل=الصاحب اللي بالهوى مخلصن له
والله مالومه لو عليها تــــولول=يلومه اللي ما نزل منزلـــن له
حيثي مجرب بالهوى الدق والـجل=ومجربٍ بالحب دقه وجـــله
أحياناً أنجح فيه وأحياناً أفـــشل=هوى شفا ما ينعرف وجهتـن له
لكن عساني بالردود اتجــــمل =وارضي عميلي والمكاسب رضن له
في ما تحوش النفس ما والله ابـخل=واللي يريده صاحبي حاضرن له
في مال وإلا جاه وإلا المصـــقل=ماصد عنه شي وأنا قادرن له
راع اللزوم بلازمه ما نتثــــاقل=عاده ولاني من ترك عادتـن له
بضاعةٍ فيها النشامى تعــــامل=ما طول وسط صدورهم عاملن له
والحب يا مساعد جروحه على الكـل=كم واحدٍ قدامـنا محتـــــفله
أحدٍ على ما ود قلبه تحـــصل=والوقت في ما يشتهي مقبــلن له
وأحدٍ محاصيله غرابيل وعـــلل=ردات حظه والصدوف تحـبل له
على كذا الدنيا محابيل وافـــتل =حبلٍ تعقد به وحبلٍ تفــــله
تغيرت ما هي على خبــرك أول=ناسٍ على اللي تخبره مسـتقله
عصر الهوى الماضي بروقه تشامل=أقفت على مزنة هبوبٍ تــجله
لو تفعله فيك الأوادم تــــهول=والكل منهم شاف بك هولتــن له
أرسلتني وأنا على شانك أفـــعل=غالي علي ومطلبك جــاهزن له
ركبت فوق اللي يجل الوطا جــل=هو منوة اللي باغين دار خــله
والله لولايه عليه أتمـــــهل=ياظنتي ما يلمس القاع كـــله
مشيت من عندك على ميلة الـظل=وعصير عند ابو العيون المظله
ممشاي ساعه بس لاكثر ولا اقـل=ولو راح لجله موتري فدوتـن له
جيت الغزال اللي لها صرت مرسل=وما ارسلتني به يا مساعد وصـله
من يوم جيته شفت وجهه تهــلهل=كنه معلم ويش أنا جايٍ له
عقب العشاء قام الكلام يتبــادل=والكل منا ما حكى طايبٍ له
طالع وقال الضيف لابد يســـال=يالله تحيي ضيفنا في مــحله
وش جبت يا ضيف المعازيب لي قل=واللي تقوله يا فتى مصغيٍ له
قلت الأمانه يالغزيّل توصّــــل=من واحدٍ قلبه معك مستحـله
وحزة سمع ما قلت والدمع ينــهل=مثل المطر من مزنةٍ مستهله
قال افتهمت وطالبك لا تكــمل =ترى الكلام اللي بقاء محتمله
أمانتك وصلت وقلبي لهــا زل=حنّا على عهد الوفاء ما نمـله
وقله تراني ما نويت اتبــــدل=بنيت له بالقلب تسعين فــله
لا شك لا يبطي ترى الصبر طول=هجره لنا طول وأنا صابرن له
قلت ابشري يابو مبيسم معــسل=حقك عليه ما أخّر العلـم لاله
والظاهر إنه يا مساعد تغـــربل=واللي حصلك يا مساعد حصله
هذي علومي وأحسن القول ما دل=زرعٍ زرعته جبتلك كل غله
والمعذره كاد إن ردي تاجل=يامرنا اللي كلنا تحت ظـله