=قصيدة موجهه من الشاعر/عبيد بن نهار الفريدي
=لشاعر/شريف ابن راكب الفريدي
=.
وش حل حلمي كان ماهو تخاريف=يامفسرة سود الحلام وصدفها
أشوف ميقافي بعال المشاريف=من العصرلين الشمس كفت طرفها
أدرج نضر عينن تهل الذواريف=على بقايا دار مالله خلفها
غيم سماها من كتام العواصيف=وستسرجت نار الدمار بسعفها
قامت تنسفها الصواريخ تنسيف=تنسيف ندافن لفرشٍ ندفها
باسراب ميراجن سوات الخواطيف=ببطونهن الموت المصفى ارففها
شفت العماير يوم راحت تناتيف=من علي أسطحها لسافل غرفها
أكبر عماره بالمدينه هكا الصيف=صباتها كبر الاضافر شقفها
حلم على ود من العام به زيف=يابو محمد شمس عمري خسفها
تبا لاهل دنيا يكيلون تطفيف=وتبا لنفسن عذرها ماعسفها
متقلدن شيطانها صارم السيف=أركى عليها ولعن الله جدفها
واستحكمت فيها الهجوس المزاغيف=واستلطفت طارن يعبث بشرفها
ماهو غرام بحب حشو النفانيف=حقي من الخفرات حظي قطفها
فاتن ثمان سنين جردٍ مراديف=وضحكات صفران الشدوق نعرفها
مازعزعني بايهات السواليف=وحلوف كذابٍ بربي حلفها
يوم النجوم المبرهزه مكاسيف=وكلاب مسعى السوق ينضح قرفها
طارن طرالي راوده طاري السِيف=أما صلاح الحال وإلا تلفها
أما بها المركب تزفه مجاديف=على آخر المينا والمركز هدفها
وإلا تصير حكايةٍ للمزاهيف=يفرح بها نقال هرجٍ حذفها
يجرها بعصير سوق الهفاهيف=ريحة هواء طبخ الحرام وصلفها
طبخ القلوب الحاقده والملاقيف=أدلالهم بالظلم تقطر اليفها
هذا كلامي يابعيد الاطاريف=خذ واردٍ صرف المصارف صرفها
من سلم سوق النقد تبرا المصاريف=صاف الثمين اللي تلاعج صنفها
وعطني من مصيبك ردود المضاريف=دامه ورد جم البحور وغرفها
ماينتعلا سد روس الشفاشيف=لانهل من عالي روابي شرفها
تم الكلام ولابقيلي تحاسيف=والنفس ماتلحق عليه بأسفها
‏

=رد الشاعر/شريف ابن راكب الفريدي
=على الشاعر/عبيد بن نهار
=.
عديت راس اللي بها للوحش قيف=كم عاد غيري واحدٍ مانصفها
وأتعبت رجليه بكثرالتواقيف=وقفت وقفه صاحبي ماوقفها
من هاجسٍ خلاني ارجع وأنا معيف=وأنسا الضعون اللي ترفرف عطفها
وأسباب مابي ياملا دون توصيف=عبرة عزيزٍ من عيونه ذرفها
من قال سم بْْسم حرش الزواحيف=وراح وتناول فروته والتحفها
عبيد كتفني بالامثال تكتيف=صدر بصافيها وخلا عذفها
ياعبيد مانارك حطبها من الليف=وعلي معصير الهبايب نسفها
وعندي خبر بأسباب كل التخاليف=وسير السفينه والهواء اللي جعفها
لكن عسى ماصار رحمه وتخفيف=أصبر على ميلة زمانك وطفها
ليا سلم من حد نجران لطريف=والسيل دارك سالمه ماجرفها
قدام يوم يقال عندك لها ضيف=وغصبٍ على من كان تأخذ ضيفها
ياعبيد لو دنياك تمشي على الكيف=كلٍ تعرض دربها ثم حرفها
هذا وبين الحلم والعلم والطيف=أبعاد لو دكتورهاماوصفها
ياعبيد خذ رايي ورأي المناكيف=كلٍ ذلوله باركه من ضَعفها
خل الفقارا اللي تنشد عن الريف=ترا هل البل منذرين بحوفها
كم واحدٍ ركب المراكب ولا شيف=يخطف بليل وصيدته ماخطفها
واليا انحدر فيه الرشاء للغراريف=حط الملام بلحيته ثم نتفها
اليا شافله يومن كثير التكاليف=يلقاه من شيطان نفسه لقفها
ياعبيد ماودي يقولون ياحيف=دارن بها ماترفع الراس عفها
دامن صفحاتك قمر وسط الارشيف=تكفى عليهن صورة الشمس ضفها
وساير زمانك لو على مد ونصيف=لو تطرد الوجبه ولو تستلفها
وحظك معك لو كنت بالجو لجنيف=حكمه لنا الله في كتابه كشفها
وكم واحد حقه من المال توليف=ركب القطار وخبزته ماشلفها
اللي على بابه عن المد تغليف=وكل على يده البعيد وكتفها
الله ينظف دار الأجواد تنظيف=من عالمن شيطانها في حففها
من طاح حطو فوق راسه غطاريف=ومن شد حاجه تلها ثم لهفها
وتبا لدنيا برقها له رفاريف=من فوق صيرانن تشح بحجفها
وتبا لرجلٍ مايعرف المعاريف=نفسه على درب الوفاء ماكلفها
طال الكلام وبلغت الهرج تقطيف=واسمح بلفات عميلك شطفها
أن كان بالمعنى تناقض وتحريف=وحرفتها قدام تجي محرفها
تم الكلام وحط بين الشراشيف=أدروس عن رؤسٍ تطاير ازلفها
واسلم وسلم واستلم خط برليف=وصلب على باقي الطؤاري ولفها
ولك مني أحلى من حليب المعاطيف=قدام تدرجها الهنود بعلفها

‏