خالد التويجري .. رثاء الملك الراحل عبد الله

[اللحالي]

وداعة الحب كل الحب يا كله=وداعة أول غلاك وحبك التالي
وداعة صدورنا والأرض مبتلة=وداعة بحورنا وسهول وجبالي
وداعة أنفاسنا مما تعرض له=وداعة إحساسنا بإحساسك العالي
وداعة القصر يا سورة ويا ظلة=وداعة الروح لا قامت تهيالي
وداعة الحرف والمعنى على حلة=وداعة إللي من الدنيا تبقالي
وداعة الحال والأحوال والحلة=وداعة البال وإللي مر في بالي
وداعة نجومنا إللي فوقنا مطلة=وداعة علومنا إللي مالها تالي
وداعة النار والفنجال والدلة=وداعة الفال يومك طيّب الفالي
وداعة المجد والتاريخ عبدالله=وداعة العز من همٍ وغربالي
سلامتك يا وطن من عارض العلة=سلامتك يا وطن من كيد عذالي
من وافق النجم في داج السماء دلّه=ومن جرب المر قدّر قيمة الحالي
الوقت سيف الوغا والموت في غلة=وكرامة النفس تسوى راس الأموالي
يا أطيب الناس طبت وطيبك جبلة=يا فيّة العمر عقب الشمس وظلالي
سيفٍ من العز راع العز لا سلة=أسمع صهيل الخيل وصوت الأبطالي
أكتب من الحب كل الحب وأرسله=يا سعد عيني متى ما وصل مرسالي
الحب خلا صحيح الحال منسلة=والشوق يغلب على راعية طوّالي
استعمر الطيب راعي الطيب واحتله=لولا الوفا بالوفا ما كان ذا حالي
الود ودك متى ما ودك نتله=والعد عدك وأنا رجلي وجمالي
في محجر إللي عزيز الدمع ماهله=لك يا حبيب العمر في القلب منزالي
أموت وأحيا وشوقي لك على مله=يا درب عمري ويا حلي وترحالي
يعقد حجاجي الوقت ويفله=ويفرق مزاجي متى ما شفتك قبالي
سويت دونك سوات الخل مع خله=لاحسه إللي يشوف وشاف الأحوالي
والحر حبل السبق في الوكر ما تله=والذيب سرحان ما هرول على الخالي
أجبر كسير العظم وأسمح عن الزلة=وأجر في عالي المرقاب موالي
أهدي مع الروح لك ما يبري العلة=وما تنهدى الغالية إلا على الغالي
حنا كتبنا القصايد بسم عبدالله=والشاهد الله علي في كل الأمثالي
الله يحسن عزا هذا الوطن كله=مرحوم يا أول غلا وأوسطه والتالي
=(ساري)