أمس الضّحى

[اللحالي]

أمس الضحى في عالي الرجم عديت=وفيضت في راسه عباير خفوقي
وقعت لين ادلولس الليل ومسيت=وحولت منّه ناشفات عروقي
ورديت من بكره عليه وتعليت=وقعدت حتى شفت شمس الشروقي
أشرف على دار بها العام مريت=واليوم ماكنه سكنها مخلوقي
خليان ماكن ابتنى بارضها بيت=بس الفجوج الخاليه والطروقي
وحتى من الأوناس ماشفت ماريت=ماغير رسم باقي له رموقي
بس الشنون محذفات تشاتيت=شنونن على الديران مثل البهوقي
وشفنا الرسوم اللي عليهن تشافيت=رسوم عليها القلب مني شفوقي
رسوم عليها من ازرق الدمع هليت=دمع تحدر فوق خدي صفوقي
ليا شفت مدهال الرجال الزناتيت=تقول قلبي ينمزع من عروقي
رجال مرابعهم تهيظك لاجيت=ومرباعهم بين الجلد والعروقي
ونجورهم للضيف ترسل تصاويت=وضيانهم بالليل مثل البروقي
رجال عليهم من قديم تربيت=وفارقتهم والقلب مني يتوقي
وابديت مافي داخل القلب وافضيت=وانساق من عمق الهواجيس سوقي
وابكي عليهم كل ماصبحت وامسيت=وشكواي لله عالم الشان فوقي
وشعاد لو اني بكيت وتمنيت=ياما بكى قلبي جزينن عشوقي
وقلبي بكى حي علي غالي ميت=والدمع عقّب في ضميره عشوقي
وياما بكى رجل عليه التثابيت=قبل الوقايع هل دمع حقوقي
ولو لمني بعض الخبول السرابيت=اهل النفاق مشدقين الحلوقي
بذني صقه عن حكيهم ماتوحيت=ولا احب ناس لسراير تبوقي
وان قالو العذال وش فيك ماابديت=ماني على اسرار الاوادم نطوقي
امشي مع العالم على ماتوريت=اعطي حقوق الناس واخذ حقوقي


للشاعر جزاء صالح الحربي

[ترانيم حربيه]

صح لسان الشاعر

وتسلم ياجدي انت على الاختيار الرائع قصيده اقل مايقال عنها

بيوتها من ذهب فعلا

[اللحالي]

تسلمين يابنتي ع الاشاده الجزله منّك يالجزله