يانجد

[اللحالي]

قصيدة يانجد لشاعر حرب/ عبدالله بن زويبن
الله يرحمه واموات المسلمين
وتعتبر من نوادره التي لم تشتهر

وصلت لي من الشاعر سعد تركي السمين


يالله يــالـلـي بــيــن كــفـك وأصابـعـك
مفـتـاح - تـحـريـف الـهـبـايب والأفــلاك

يـالـلـي بـمـلـك الـكـون مـحـدٍ يـنـازعك
الـمـلـك مـلـكـك وأنـــت مـلاك الأمـلاك

وعــن مـاتـشاء - مـاتقدر الـخلق تـمنعك
ويوم الـلـقـاء - نرجي تجـاوزك وإعـفـاك

و حـيـرتني يـالـقاف وشـلون ابـا أبدعك
يـاصـعـب تـركـيـبك و تـوضـيـح مـعـناك

أحـيـان مـاقـدر - فـيـك وأحـيان أطـوعك
عـقـب الـعـصايه لـيـن يـنـقاد - مـمـشاك

وأخـلـّي الـلـي يـفـهم الـشعر - يـسمعك
وإن ما أنشعى - هذا يبي - ينشعي ذاك

ولا كــل رجــالٍ بــرايـه يــجـي مــعـك
ولا كــــل رآيٍ تــقـتـدي فــيــه قــداك

وتــراه مـايـجزع لــك إلاّ مــن أجـزعـك
قـــال الـمـثل مـن لا يـزعّـلك مـارضـاك

والـلـي مـعـك فـي كـل شـيٍ يـشجعك
تــراه مــبــدولٍ عــلـى الــدبـك دبــاك

ويـــن أنــت يـالـلي عـايـزاتٍ طـبـايعك
فــي كـــل جــانـب كــامـلاتٍ مـزايـاك

وش إسـمك الـكامل ووش - إسم موقعك
الـناس يـطرونك و أنـا أزريـت -لا ألـقاك

مــن قــال لـك مـابك عـذاريب - خـادعك
أمـــا غــبــي وألا مــنـافـق ونــمــاك

مـاكـامل إلاّ الـلي مـن الـرمل يـجمعك
الــواحـد الــلـي لـه مـمـيتك ومـحـياك

والـظـن فــي بـعـض - الاوادم يـضـيعك
لــو أنــت رجــالٍ مـعـك عــرف وإدراك

لـكن تـرى الـشّده عـلى - الـسّر تـطلعك
ويـبـيـن لـــك بـالـناس مـاكـان يـخـفاك

وتـبـيّـن الـلـي سـاعـة الـضـيق يـنـفعك
وتـبـيّـن الــلـي سـاعـة الـعـسر يـكفاك

إلـيـا سـبـرك وشــاف بـقـعا تـصارعـك
لـو هـو قـصيرك مـن هكا اليوم ينسـاك

و إن حـل ذكـرك فـي الـمجالس يـقطّعك
بـالـهرج حـطّـك بـيـن أشـافيه مـسـواك

الـطـيّـب الـطـيّب إلـيـا طـحـت يـرفـعـك
شــيـكٍ بـمـخـبـاتك وســيــفٍ بـيـمـناك

قـلـبـه عـلي قـلـبـك وعـيـنـه تـطـالـعك
لـو الـبحـر دونـك إلـيا أومـيت لـه جـاك

والـوقـت لابــدّه مــن الـقـيض يـشـبعك
و الـلي وطـى غـيرك مـن الـناس ياطاك

لــو إن بــه شــيٍ عـلي الـكبد يـوجعـك
الـصـبر واجــب والـفـرج عــنـد مــولاك

يــا نـجـد وش ضـيّـقـك والله مـوسـعـك
الـلـي مـنـوّل تـمــرح الـنـاس بـأرجـاك

حــنّـا نــعـايـن والــمـشـفّـح تــوزعـك
تـقـطّــعـوا حــتـى جـبـالـك وصـحـراك

جـونـا وراحـوا فـي سـكـنـك ومزارعـك
والـمشكله كـان الـطمع صـار فـي مـاك

ضـاعوا بـك الـلي يـوم ترجـف مدافعـك
ضـد الـشريف حـسين وجـنـود الاتـراك

مـن فـعـلـهم كــل الــدول مـاتـزعـزك
مـاهــم بــحـجّـاجٍ يــروحــون مــنــاك

والـيـوم جــوك وضـيّـقوا فـي شـوارعك
سـكّـان جــاوه والـحـضـارم ومـا أدراك

مــاجـولـك إلا يــوم كــثــرة طـمـايـعـك
يـوم إن أخـو نـوره مـن الشـوك صفـاك

الشاعر / عبدلله بن زويبن الحربي
الله يرحمه واموات المسلمين