يامرحبا

[اللحالي]

يامرحـبـا بالـلـي لـفـت تـالـي الـلـيـل
وانـــا لـحـالـي نـايــمٍ وســـط خـيـمـه

بــارضٍ - خــلا مـاعـنـدي الا المعـامـيـل
عــلــى طــرف وادٍ كــبـارٍ هـشـيـمــه

رحبت - فيهـا - وارفـع - الصـوت بالحيـل
ومـن - الفـرح قلـبـي نـسـى مايظيـمـه

صارت - تصـب - الخيـر - فوقـي هماليـل
وانــا احـمـدالله واطـلـب انــه يـديـمـه

قضيـت - ليلـي - حـمـد تسبـيـح تهلـيـل
اشـكـر كـريـمٍ جــاب لـــي هالكـريـمـه

راحـت - وانـا - لبروقهـا اشـوف واخـيـل
لـيـن الـرّعـد مـاعــاد يـسـمـع رزيـمــه

من بعد - ساعـه - جـرّح - الـوادي السيـل
وتتابـعـت - ديـمـه تـجـي بـعــد ديـمــه

ومــن الغـديـر الـلـي يـــداو المعـالـيـل
يشفـي - كـبـودٍ - مــن ضمـاهـا محيـمـه

غسلـت كـبـدي - مـنـه بـأربـع فناجـيـل
وراحـت همـومٍ - وســط قلـبـي مقيـمـه

داويــت - قلـبـي عـنـك يانـافـل الجـيـل
وصــار الـغـلا مـاعــاد لـــه اي قـيـمـه

خلاص - انا ابى - انساك - رغم - البهاذيل
ورغم - ان لك - في القلـب قيمـه وشيمـه

ابــى اعـلــن فـراقــك ولافـيــه تـأجـيـل
ولااظــــن فـيـهـالـك ولا لــي ظـلـيـمـه

ولاعــاد فــي الـقــرار تـبـديـل تـعـديـل
لــو كـان فــي - حــق المحـبـه جـريـمـه

عن الهوى - داويـت - قلبـي - مـن السيـل
ولـيـا - بـغـى يـرجـع - اقـــول الحـريـمـه

الشاعر نداء الغيداني


يامبدي - الترحيب - جزل التباجيل
في من - قنوفه - بالثّعايل -رحيمه

رحمة جليل الملك - منشي المخاييل
الله - - يهنينا - - بوافر - - نعيمه

نعم يابو -سامي - كلامك - بتفضيل
عندي وعند اهل العقول - الفهيمه

و الله - مالومك في كلام التّصاميل
اللي - مهار الفكر جنّ - في وليمه

الوالم - اللي - جادبه - فايق القيل
من فكر ابو سامي تشيّد - حسيمه

عزّ- الله انّك - يانداء - لك - تنافيل
بالمفردات - ولك - عليهن و سيمه

ياصايغ - المعنا - بجزل - التّحاكيل
نهمت - فكري - و أستثار - بنهيمه

واقول - يامغازل - بليلك مهاضيل
تقول - بآخر - ليل - جالك - ركيمه

ماغازلك - بالليل - غير - الثواعيل
يامخادنٍ - جنح - الظلام - و جهيمه

يوم - اجتلدسفك الثّعول السّوابيل
على جلاد الارض - تسمع - زهيمه

يزهمك ياللي صاب نومك شواليل
وحيام - كبدك - والكبود -المحيمه

وان جات ساعات الفرج بالتّكاميل
تغيّر المفهوم - واوضح - رسيمه

ياللي ماهو خافيك عصر الجماميل
وبعرفكم - للمحمضه - و الوخيمه

يوم الرّشاء و السّانيه و المحاحيل
عندك - خبر حال - النّديم - ونديمه

وعن الهواء لاتزهم العود وإيعيل
من - بعد مصداره بذيك الخريمه

وعن المقافي يستخير المقابيل
ثم - ينفض عنانه وذيك الرّشيمه

اللحالي / والمجاراه المتواضعه

والعذر والسّموحه من الجميع والله ماني شاعر لكن مفردات ابن عمّي صوّتت لي

[معيض الضعيني]

بيض الله وجه ووجه ابن عمك
الجزاله لكم عاده يالغيادين وصحت السنتكم وابدعتم لاعدمناكم
شكرا أبا سامي
شكرا أبا سلطان

[اللحالي]

هلابك وحيّاك ابو وليد

صح الله بدنك يالامير وجزاك الله خير ي ابن العم واخوانك المسلمين

[دحمان-الحاج]

صح لسان الشاعر نداء الغيداني
وصح لسانك يا اللحالي
يا ابو سـلطان يا شـاعرنا الغالي
�� ��

[اللحالي]

هلابك وحيّاك ابو ابراهيم

صح الله بدنك ي الامير واخوانك المسلمين

جزاك الله خير يالغالي ومشكور / تحياتي وتقديري للجميع

[اصايل]

صح الله ألسنتكم
مبدعين
تحياتي واحترامي

[اللحالي]

صح الله بدنك اصايل

الله يجزاك الخير واخوانك المسلمين

تحياتي و تقديري للجميع