شفت راسي

[اللحالي]

البارحه فالمنضره شفت راسي
وابطيت اطالع فيه حتى عرفته

اشهب مثل ذيب الجبال الرواسي
غفلت عنه سنين واليوم شفته

فكرت لي ساعه وطحت امتواسي
ونهضت اعد سنين وقتٍ وصفته

فرحه وحزن وغفلةٍ ماتقاسي
مدري وش اللي جبت واللي صرفته

فترة سنين العمر وقتٍ قياسي
وانا احسب اني باقيٍ مانصفته

وحسيت بالغربه وضيق المماسي
في منزلٍ فوقي تهايل جرفته

وخفيت ماحسيت بين القواسي
واللي يدور ابفكري العام عفته

نسيت والديان ماهو بناسي
يجيك في يومٍ من الصغر خفته

لا والله الا طار عني نعاسي
في لحضةٍ فيها عقالي حذفته

يارب لن فارقت حيي وناسي
انت الكريم ومكرم الضيف ضفته

منقول؛؛؛
صح لسان شاعرها
واختيارمرسلها

[اصايل]

صح لسان الشاعر أبيات معبرة

وتسلم يمينك ياعمي على النقل

أحترامي وتقديري

[اللحالي]

صح الله بدنك اصايل والله يسلمك من كل مكروه
واخوانك المسلمين